The Egg

By Andy Weir (Read the original)
Translated by Nalvai in March/May 2025

le sovda

.i do ca lo nu do mrobi'o cu ca'o klama lo do zdani

.i karce snuti .i le nu go'i cu fadni ra'u gi'e ku'i mrori'a .i do zo'u pa speni .e re panzi cu jai ranji .i le nu mrobi'o cu na crori'a .i le sukckape mikce cu mutce troci lo nu do di'a jmive .i ku'i na snada .i je'u ju'o le xadni be do cu mutce porpi ja'e lo nu zanmau fa lo nu do morsi

.i ca ku do penmi mi

.i do lu ma... fasnu? li'u .alcu do lu .i mi ma zvati li'u

.i lu do ba'o mrobi'o li'u mi se cusku co stace .i no da kosmu lo nu cusku rivbi

.i do cusku lu .i da... bevma'e... .i je ri sakli... li'u

.i lu je'e li'u se cusku mi

.i do cusku lu .i mi... ca morsi? li'u

.i lu .i go'i .i ku'i .e'o na badri .i ro prenu cu mrobi'o li'u cu se cusku mi

.i do catlu fa'a so'i da .i ku'i no da se viska .i po'o do .e mi zvati .i do lu .i ti mo stuzi li'u preti .alcu do lu .i xu ti stuzi co pruxi li'u

.i lu .i go'i sa'e nai li'u se cusku mi

.i lu .i xu do cevni li'u se retsku do

.i mi lu .i go'i li'u danfu .alcu mi lu .i mi cevni li'u

.i do lo'u .i lo mi panzi... lo mi speni le'u .alcu

do lo'u zo'u mo le'u

do lu .i xu je no xlali cu fasnu li'u

.i mi lu .i .i'e sai li'u .alcu mi lu .i do zi mrobi'o gi'e xanka tu'a ra'u lo lanzu be do .i la'e di'u cu zabna li'u

.i do cinri je manci catlu mi .i do zo'u mi lo cevni cu na simsa .i ja'a go'i lo nanmu .i la'a cu'i go'i lo ninmu .i go'i lo co'e catni la'a cu'i .i go'i le'e ckule ctuca se mau le'e vlipa be ro da

.i mi lu .i .e'o do na xanka li'u .alcu mi lu .i no xlali cu fasnu .i do prane ro zu'i fi'o morji le do panzi .i ri zo'u no da ditcu lo nu binxo lo to'e sinma be do .i le do speni cu tarti co klaku gi'e ku'i mipri co zifre cinmo .i so'ei le do za'i speni cu jai se fliba .i bi'u sei kufygau la'a cu'i le do speni cu cinmo lo ka zekri mutce kei lo nu zifre cinmo li'u

.i do lu .ua li'u .alcu do lu .i ca ku ma fasnu .i xu mi klama lo mu'a ceizda .a lo mu'a pacraistu li'u

.i mi lu .i na go'i li'u .alcu mi lu .i do za'u re'u zirli jmive li'u

.i do lu .ua sai li'u .alcu do lu .i ja'o le'e xindo cu drani li'u

.i mi lu .i ro da poi lijda cu drani lo da se steci li'u .alcu mi lu .i .e'o do cadzu ka'ai mi li'u

.i do jersi ca lo nu mi'o cadzu litru lo kunti .i do retsku lu .i mi'o klama ma li'u

.i mi lu no da ra'u li'u .alcu mi lu .i xe'o zabna fa lo nu cadzu ca lo nu tavla li'u

.i do lu .i ku'i ma kosmu li'u preti .alcu do lu .i ca gi mi za'u re'u jbena gi mi kunti pe'a po'o .ie pei .i cifnu .i ja'o ro da poi mi lifri ja zukte ke'a cu nalvai li'u

.i mi lu .i na go'i li'u .alcu mi lu .i do se pagbu ro da poi do djuno ja lifri ke'a ca lo do pu nunji'e .i xe'o do ca na morji ja vedli li'u

.i mi co'u cadzu gi'e jgari do fo lo birjanco .i mi .alcu lu .i le ruxse'i be do cu se manci je melbi je banli se mau ro ka'e xanri be do .i lo'e menli be lo remna cu ka'e jimpe fi pi so'u po'o me do .i simsa lo nu ta'i lo nu punji lo degji lo djacu cu merli lo nilgla be dy. .i do punji lo cmalu pagbu be do lo nenri be le vasru .i ca gi do tolpu'i gi do cpacu ro le se lifri

.i do remna ba'o ze'u lo nanca be li vo bi .i ja'e bo za'o na ku do preja gi'e ganse le drata ke bratce menli be do .i va'o da'i gi mi'o ze'u stali ti gi do co'a morji .i ku'i no da kosmu la'e di'u fi'o se jbini le'i nu jmive li'u

do lu .i mi xo roi zirli jmive li'u

mi lu .y. so'i .i so'i sai .i zilri nunji'e so'i da li'u

mi lu .i ca ku zo'u do binxo lo jungo ke cange nixli be ti'u la'e li mu vo no ny. li'u

do lu .ue .ua nai li'u

do noi xanka ku'o lu .i do mi mo'i pu benji li'u

mi lu .y. sa'e ju'o cu'i .i lo si'o temci kei be do cu zasti fi tu'a lo po'o munje be do .i lo krasi be mi zo'u drata li'u

do lu .i ma krasi do li'u

mi lu je'e .i mi se krasi da .i da poi drata .i ji'a de panra mi .i .au dai do djuno lo du'u ra mo kau .i ku'i so'ei do na ka'e jimpe li'u

do lu .ua li'u

do noi milxe co badri ku'o lu .i ku'i .i da'i mi zirli jmive ca lo drata cedra .i se ni'i bo mi ka'e jikca mi ca da li'u

mi lu .i go'i .i pi ro roi go'i .i ji'a fau gi re da poi jmive zo'u da sanji da po'o gi do na djuno lo du'u la'e di'u fasnu li'u

do lu .i ja'o ma kosmu la'e de'u li'u

mi lu zo'o pei li'u

mi noi te preti ku'o lu do te preti le kosmu be lo'e nunji'e fo mi .i xu pau nai la'e di'u jai lemkai li'u

do noi to'e randa ku'o lu .i de'u jai racli preti li'u

mi noi catlu lo kanla be do ku'o lu lo ka kosmu be lo nunji'e gi'e te zukte lo nu mi finti pi ro le ti munje cu se ckaji lo nu do binxo lo makcu li'u

do lu .i xu do skudji lu loi ro prenu li'u .i xu do djica lo nu mi'a makcu li'u

mi lu .i na go'i .i do po'o .i mi finti le ti munje tu'a do po'o .i fau ro nunji'e do banro gi'e makcu zenba gi'e binxo lo bramau je balmau menli li'u

do lu .i mi po'o pei .i le drata cu mo li'u

mi lu no drata cu zasti .i le ti munje zo'u zasti fa po'o do .e mi li'u

do noi noncnitra catlu mi ku'o lu .i ku'i ro le prenu be bu'u le terdi li'u

mi lu .i ro go'i cu me do .i se steci nunji'e do li'u

do lu .ua .i mi me ba'e ro prenu li'u

mi noi zanru darxi do lo xance lo bekpi ku'o lu .ua dai bu'o .i'e li'u

do lu .i xu mi me ro lo prenu poi pu jmive li'u

mi lu .i go'i .i ji'a me ro lo prenu poi ba jmive li'u

do lu .i mi me la .abraxam. .linkoln. xu li'u

mi noi te pinka ku'o lu .i je ji'a do me la .djan. .uilkis. .but. li'u

do noi se rigni ku'o lu .i mi me la .xitler. xu li'u

mi lu .i je ji'a do me so'i ki'o ki'o se catra be xy. li'u

do lu .i mi me la .iesus. xu li'u

mi lu .i je ji'a do me ro tinbe be fi .i bu li'u

.i do smaji

.i mi lu .i va'o ro nu do jai xrani da kei li'u .alcu mi lu do jai xrani do .i va'o ro nu do zukte lo te xendo kei do zukte se va'u do .i ro lo se gleki ja se badri poi se lifri lo prenu ca da cu pu ja ba se lifri do li'u

.i do ze'u pensi

.i do te preti fi lu mu'i ma .i mu'i ma do zukte li'u

.i mi cusku lu .i mu'i bo ca da do binxo lo simsa be mi .i ki'u bo do me ri .i do se lanzu le mi lanzu .i do panzi mi li'u

.i do lu .ue li'u .alcu do noi senpi ku'o lu xu do cusku lo se du'u mi cevni li'u

.i mi cusku lu na go'i .i do pu'o cevni .i do ca tarbi gi'e ca'o banro .i va'o gi do lifri ro nunji'e be lo prenu gi do banro banzu lo nu jbena li'u

.i do lo'u .i ja'o pi ro le munje le'u .alcu do lo'u cu xe'o le'u

.i mi noi dafsku ku'o zo sovda .alcu mi lu .i .ei ca ku do lifri le do za'u moi nunji'e li'u

.i mi jai be'i litru fai do

fa'o